Kang Khemad nggok Kang Sudir saling pandang. Cacam iruk nian batin mude khang due ini. Pasalnye sikok: MATIKAN MESIN. Tangan tenggil Kang Khemad lah nir-tir nak nak nangani palak batin mude khang due, ye cak kepakaman nian di urusan pelitek ni.
“Sabar Mang Mad, khalah nak meringas kudai kamu nganeng umongan ku di hape tadi. Aku ni dang belajakh njadi tim sukses metekan akhapan pelitek. Mang Pindi ye nyaleg ndai Partai Cekhu Mude tu, matikan mesin! Nyerah die dek sanggup ngadapi situasi nak pemilu ye nggile puse ni.” Sur-sur Marjun mbace ringgak muke Kang Khemad ye lah nak meringas.
“Au Mang Mad, Mang Sudir, sabar kudai khalah lum-kebelum lah nak khengam nginak kami khang due ni. Baju kaos ye ku tulisi mak ini ni juge bagian ikhtiar pelitek pule. Cuman ikhtiar di pingger gelanggang pelitek.
“Sudelah! Teserah kamu khang due tulah. Nak jadi tim sukses caleg, ape nak ngintangi caleg ye nak mbagi duit. Itu urusan ngan khang due. Tanggunglah diwek kele resiko peliteknye!” Sentak Kang Khemad lok jeme kene legate nahan ringas.
“Mulai sakhi ni dekde agi Mang Mad. Tubat nian kami khang due ni. Dem kan matikan mesin pule!” Timbal Marjun nggok Rudin sebarangan.
“Au jadilah itu. Ngan khang due ku enjok tugas. Kundang mutor CeBe ni ke bingkel Sukar, benakhi!” Perintah Mang Sudir ke batin mude khang due tu.
“Payu Mang. Siaap!” Simbat Marjun sikap sempurne lok Linmas TPS. Pas di engkol-engkol endak idup-idup mutor CeBe tu. “Ngape diengkol-engkol ni endak idup ni, Mang Sudir?” Tanye Rudin lah masang muke supak.
“Mati Mesin!” Timbal Mang Sudir singkat. Marjun nggok Rudin saling asati. Ndookk aii, jaoh juge nak ngunjukan mutor CeBe mati mesin ni ke bingkel Sukar, ade kalu sekilu lebeh. Hahaha luntam gawi mati mesin ni.
Lukak bepeloh liut batin mude kang due ni ngunjukan mutor CeBe mugok tu. Untaplah kamu khang due, Jun, Dir. Bagian ikhtiar gale itu. Kalu mujur idup kele mesin CeBe tu, pacak keliling agi nyakakh kintangan pelitek lain. Tabek. (*)
Penulis adalah Penulis Tetap di TBMNews
